"العمل على بناء سوريا سيكون بأفضل نموذج"..الرئيس الشرع في كلمة خلال لقائه وفداً من وجهاء ريف دمشق
2026-06-13خطاب
والمهم جداً إنه نحن نتكاتف بالأيام القادمة لإعادة بناء سوريا، مثل ما كان في ظل الثورة السورية كان في توافق كبير، كنا بنختلف على أشياء كثيرة لكن كلياتنا بنتوافق على إسقاط النظام وتغيير منظومة الحكم في سوريا. وريف دمشق دفع فاتورة كثير كبيرة لأجل هذا الهدف النبيل والحمد لله الله عز وجل مكنكم وانتصرتوا على الظلم وانتقلنا إلى مرحلة جديدة.
فبنفس هذا الشعور نحن اليوم محتاجين إنه كمان كلياتنا نتكاتف مع بعضنا لحتى نبني سوريا، وسوريا جريحة وبدها شغل كثير مع بعضنا لحتى نحسن نعالجها ونداويها، فبدنا نصبر كثير على بعض وبدنا نتحمل بعض كثير ومو دائماً الظروف بتكون كثير مثالية، طموحاتنا عالية جداً بس أحياناً الواقع بيحكمنا ببعض الأشياء فبدنا نراعي بعض.
والمهم إنه مثل ما تكاتفنا جميعاً وتحملنا الأضرار على إسقاط النظام مهمتنا ما خلصت، نحن بس فتحنا الباب هلا، فلسا قدامنا شوط كثير طويل حتى نعيد بناء سوريا ونرجع نرجعها إلى مكانتها التاريخية والحقيقية اللي بتليق بحضارتها وبتليق بقيمها وأخلاقها وكل الظروف المحيطة فينا والحمد لله البدايات حسنة بشوف أنا ما المفروض أنا اللي قيم بس حسب ما أنقل من المعايير العلمية اللي مراقبين لسوريا بداية حسنة جداً وفيها تفاؤل كثير كبير محتاجين إلى إنه نحن نصبر شوي مع بعض حتى نوصل إلى الطموح اللي نحن بنأمله والحمد لله نحن دائماً بنشوف قديش همة الناس اللي موجودين معنا فمنزيد عليهم شيء 50% إضافية وبعدين بنحط أهداف على هذا الأساس.
فمثل ما الله عز وجل نصرنا بمعركة 12 وأسقطنا هذا النظام فبإذن الله تعالى العمل على بناء سوريا راح يكون إن شاء الله بأفضل نموذج.